دوسرا ٹیسٹ: پاکستان ٹیم فالو آن کے بعد دوسری اننگز میں بھی مشکلات کا شکار

پاکستان کرکٹ ٹیم کو آسٹریلیا کے خلاف دوسرے ٹیسٹ میں شدید مشکلات کا سامنا ہے جہاں قومی ٹیم پہلی اننگز میں فالوآن کا شکار ہونے کے بعد دوسری اننگز میں 3 وکٹوں پر 39 رنز بنالیے ہیں اور مزید 248 رنز کے خسارے کا سامنا ہے۔

ایڈیلیڈ میں کھیلے جارہے ڈے اینڈ نائٹ ٹیسٹ میچ کے تیسرے روز کھیل کا آغاز ہوا تو پاکستان نے اپنی پہلی اننگز میں 6 وکٹوں پر 96 رنز بنائے تھے تاہم بابراعظم کے ساتھ لیگ اسپنر یاسر شاہ نے بیٹنگ کے جوہر دکھائے اور انہوں نے ٹیسٹ کیریئر کی پہلی سنچری بنائی۔

یاسر شاہ کے 113 اور بابراعظم کی 97 رنز کی اننگز کی بدولت پاکستان نے پہلی اننگز میں 302 رنز بنائے لیکن بھاری مارجن کے باعث فالوآن کا سامنا کرنا پڑا۔

قومی ٹیم نے فالو آن کے ساتھ دوسری اننگز کا آغاز کیا تو ایک مرتبہ پھر اوپننگ ناکام ہوئی اور امام الحق صفر پر پویلین لوٹ گئے۔شان مسعود کے ساتھ اننگز کا آغاز کرنے والے امام الحق جوش ہیزل ووڈ کی گیند پر ایل بی ڈبلیو ہوگئے۔

کپتان اظہر علی مسلسل چوتھی اننگز میں بھی ناکام ہوئے اور امام الحق کے بعد وہ بھی ٹیم کو 11 کے اسکور پر چھوڑ گئے جس میں ان کے صرف 9 رنز شامل تھے، وہ مچل اسٹارک کی گیند پر آؤٹ ہوئے۔

جس کے بعد ایڈیلیڈ میں بارش کی وجہ سے پاک-آسٹریلیا دوسرا ٹیسٹ میچ روک دیا گیا۔

بارش کے تھمتے ہی کھیل کا دوبارہ آغاز ہوا تو پاکستان ٹیم کو سب سے بڑا دھچکا لگا جب پہلی اننگز میں ذمہ دارانہ بلے بازی کا مظاہرہ کرنے والے بابر اعظم 8 رنز کا اضافہ کرکے ہیزل ووڈ کا شکار بنے، انہوں نے شان مسعود کے ہمراہ پاکستان کو 20 رنز تک پہنچایا۔

ایڈیلیڈ ٹیسٹ کے تیسرے روز کے اختتام پر پاکستان نے 3 وکٹوں پر صرف 39 رنز بنائے تھے اور پہلی اننگز کے خسارے کو ختم کرنے کے لیے مزید 248 رنز درکا تھے۔

شان مسعود 14 اور اسد شفیق 8 رنز بنا کر کریز میں موجود ہیں۔

Leave a Reply

Your email address will not be published. Required fields are marked *